Eins og félagsfólki er kunnugt, þá leitast Steinsteypufélag Íslands stöðugt við að vekja athygli á mikilvægi steinsteypu í umhverfi okkar, enda er steinsteypa eitt helsta byggingarefni Íslendinga. Liður í þeirri viðleitni hefur verið að kalla eftir ábendingum vegna Steinsteypuverðlauna en viðurkenningin er veitt mannvirki á Íslandi þar sem saman fer áhugaverð og vönduð notkun á steinsteypu í manngerðu umhverfi. Um síðustu mánaðamót var leitað til til félaga verk-, tækni- og byggingafræðinga, arkitekta, listamannna og iðnaðarmanna og nokkurra annarra valinna fyrirtækja, stofnana og nefnda um ábendingar, en að sjálfsögðu er öllum heimilt að senda ábendingar.
Leiðarljósið er að mannvirkið:
- sýni steinsteypu á áberandi hátt,
- sé framúrskarandi vegna arkitektúrs, verkfræðilegra lausna, gæða steinsteypu og handverks,
- búi yfir frumleika og endurspegli þekkingu í meðferð og notkun steinsteypu. Gæði og áferð steinsteypu vega þungt í mati,
- auðgi umhverfið, inniberi gæði, glæsileik og nytsemi og sýni augljósan metnað í samhengi við umhverfi sitt,
- sé byggt á síðustu fimm árum og í notkun.
Viðurkenningin verður veitt mannvirkinu og þeim aðilum sem að því standa, svo sem verkkaupa, hönnuðum og framkvæmdaaðilum. Viðurkenningin verður afhent á Steinsteypudeginum þann 26. febrúar 2027.
Óskað er eftir því að ábendingar berist félaginu fyrir 1. desember 2026. Þeim fylgi eftirtalin gögn:
- heiti mannvirkis, staðsetning og eigandi,
- verkkaupi,
- hönnunarteymi,
- framkvæmdaaðili og – framkvæmdaár,
- hvenær tekið í notkun,
- stutt lýsing á mannvirki, kennistærðir og hlutverk steinsteypu,
- ljósmyndir og, ef vill, myndbönd (teikningar óþarfar).
Tillögur og fyrirspurnir skulu sendast á netfang félagsins: [email protected]
Stjórn Steinsteypufélags Íslands áskilur sér rétt til að meta mannvirki á innsendum gögnum sem og að óska eftir frekari upplýsingum um verkið.
Stjórn Steinsteypufélags Íslands





